• Poderán participar rapaces e rapazas que presenten as súas obras en lingua galega. Os traballos deben ser orixinais e inéditos en toda a súa extensión.
• Establécense dúas categorías: A (de 6 a 12 anos) e B (de 13 a 16)
• Cada autor/a pode presentar unha obra que non sobrepase os cinco folios para a categoría A e dez folios para a B
• Haberá dous premios por categoría, coa contía: 400€ – 400€ / 500€ – 400€
• O prazo de admisión remata o 31 de marzo de 2010
• As obras, encadernadas ou grampadas, levarán por detrás do último folio os datos do autor ou autora: nome e apelidos, enderezo, teléfono, correo electrónico (se o ten), centro de estudos e categoría na que participa.
• A presentación de orixinais farase por correo postal dirixido á súa sede:

Asociación Cultural O Facho

r/ Federico Tapia, 12, 1º

15005, A Coruña

Podes coñecer outras convocatorias no blogue Revolta da freixa.

A TODA A COMUNIDADE EDUCATIVA DO IES DA POBRA DO CARAMIÑAL

Ante a publicación por parte do Consello da Xunta das “Bases do decreto de plurilingüismo” e ante a convocatoria de folga xeral no ensino para o xoves 21 de xaneiro, o ENDL quere transmitir as seguintes consideracións.

• Este borrador de decreto supón o incumprimento por parte da Xunta de Galicia das súas obrigas lexislativas e de promoción do galego, tal como esixe o Estatuto de Autonomía e a Lei de Normalización Lingüística, trasladándolle esta responsabilidade aos centros de ensino e ás familias.

• Sen ningunha dúbida, a aplicación deste proxecto suporía crear conflitos e tensións na comunidade educativa, división social e diferenzas educativas que nos prexudicarían a todos.

• Preténdese equiparar, como lingua vehicular do ensino, o galego, o castelán e o inglés. No caso das dúas linguas oficiais, é unha medida discriminatoria ao haber unha situación social de fonda desigualdade a favor do castelán. Pola súa parte, equiparar o inglés coas linguas oficiais é de dubidosa legalidade e traerá como consecuencia o incremento do fracaso escolar. Hai outras opcións, máis viables e efectivas, para mellorar as competencias en linguas estranxeiras, que, curiosamente, non se atenden e mesmo se reducen.

• Ademais, de acordo cos estudos máis rigorosos, a competencia comunicativa do alumnado mermaría ao ser imposible acadar destrezas suficientes na lingua galega, base dun verdadeiro plurilingüismo. A Lei Orgánica de Educación establece que ao final de cada etapa educativa o alumnado debe desenvolver competencias parellas nas dúas linguas oficiais, obxectivo que non se cumpriría coa redución do galego ao 33% das horas lectivas como lingua vehicular que se recolle neste borrador.

• Unha agresión á nosa identidade coma esta é aínda máis grave ao ser o propio goberno autonómico quen a realiza, cando está obrigado a manter a progresividade no amparo institucional ao idioma propio de Galicia, como recolle toda a normativa ao respecto, aprobada por consenso nestas últimas décadas, e cando os datos sociolingüísticos indican que se produciu nese período un acentuado retroceso no uso do galego como lingua inicial.

Por todo isto, o Equipo de Normalización e Dinamización Lingüística entende que é preciso secundar a folga do día 21 e sumarse ás mobilizacións previstas para ese día.

A Pobra do Caramiñal, 19 de xaneiro de 2010

ENDL do IES da Pobra

O Equipo de Normalización e Dinamización e mais o Equipo TIC son os responsábeis desta exposición situada na Sala de usos múltiples e realizada como complemento á presentación publicada na rede. Unha escolma dalgunhas das mellores ferramentas para a creación e xestión de blogues, redes sociais, escritorios virtuais, fotologs, planetas de sitios… en galego.

Agora comeza a elaboración de guías áxiles que mostren as posibilidades, fundamentalmente educativas, destas aplicacións da web e as claves do seu manexo, para proveito de toda a comunidade escolar, tamén as familias.

A exposición completa, na nosa galería.

Aproveitounos ben a visita do escritor e ilustrador Anxo Fariña, organizada pola editorial A Nosa Terra dentro do programa de dinamización Bocaberta. Deunos algunhas receitas para bosquexar historias, compartiu experiencias de creación, mostrou algunhas claves da súa obra e ofreceunos unha estupenda demostración de creatividade. E, aínda por enriba, con participación constante. Velaquí a crónica de 1º ESO C:

O martes 24 de novembro, o grande escritor e ilustrador Anxo Fariña veunos visitar ao noso instituto.
Uns estabamos ilusionadísimos por el e outros tamén por perdermos clase. Diego Rivas pensaba que Anxo ía ser un vello e Miguel García cría que ía ser gordo e con lentes de vaso.
A charla empezou saltándolle a alarma de virus ao computador e todos rimos.
Ensinounos a crear historias a partir de algo tan sinxelo coma un punto e nós axudámoslle imaxinando historias.
Logo pediu un voluntario para debuxalo e o afortunado foi Rubén Blanco, de 1º A. (Que sorte, sempre lle toca todo a el). Todos escachamos a rir, e el estaba moi contento. Tiñamos moitas preguntas para lle facer, pero o tempo non daba para máis, que mágoa! Era o momento de voltar para as aulas. Aínda queriamos que nos asinase Os Megatoxos, pero eramos moitos, así que asinou uns poucos.
Foi fenomenal! Gustaríanos a todos que volvese porque estivo moi entretido.
1º ESO C

E que dixo o alumnado de 1º ESO B?

• Gustoume moito, pero o que máis foi o debuxo (Marta Fernández)
• Foi unha mágoa que non houbese máis tempo (Iván Míguez)
• Gustoume cando inventamos os contos (Abna Muñiz)
• Gustoume moito, sobre todo os debuxos que fai pola rúa (Daniel Nóvoa)
• O que máis me gustou foron as escusas (Lucía Olveira)
• Gustáronme as fotos (Paulo Otero)
• Gustoume o novo título dos Megatoxos (Paula Castro)
• Non me gustou porque non me regalou o terceiro libro (Salvador Pérez)
• Gustoume moito porque había un virus no ordenador (Manuel Paz)
• Non me gustou porque pola súa culpa perdín dúas bolsas de gusanitos (César Piñeiro)
• Perdín o partido de xadrez e naturais (Damián García)

Así o recolle A Nosa Terra TV noutro centro:

Ao blogue dos Megatoxos!

Premios: Globo de Ouro, Óscar (8 estatuíñas)

Sitio Oficial

Esta película trata dun rapaz da India que se fai millonario a través dun concurso televisivo, que el utiliza realmente para recuperar a rapaza amada. Ao procurar a resposta a cada unha das preguntas, vai recordando a súa vida, iniciada nun contexto de marcada pobreza, no que sofre a perda da nai por motivos relixiosos e, a pesar diso, xunto con seu irmán, conseguen manterse por si mesmos.

Está baseada na realidade actual, aínda que sen mostrar as causas da miseria e a violencia, e transmite unha mensaxe optimista. Ademais, é quen de manter a intriga e conta cunha fotografía impresionante. Recomendámola.

3º PDC

Máis información e trailer, aquí.

Como se fixo, neste vídeo de RTVE

Pode verse completa, con subtítulos en varias linguas, entre elas o inglés, aquí.

A obra teatral Comedia bífida pretende mostrar dun xeito cómico, ao mesmo tempo que irónico e provocador, a situación de “bilingüismo” que se está a dar en Galicia.
A obra está chea de elementos simbólicos e metáforas, tales coma o feito de que os espectadores sexan durante a representación almas a punto de ser xulgadas polo feito de falar ou non a lingua propia. Tamén é moi significativo que a defensa dun bilingüismo galego-castelán sexa levada a cabo por un arcanxo e sexa precisamente o demo quen tente amosarlle ao xurado a marxinación que os galegos estamos a facer contra a nosa propia lingua.
Móstranse moitas situacións levadas ao extremo, pero que son moi representativas e que, desde a ironía, tratan feitos cotiáns: a muller que lles fala aos seus fillos en castelán porque considera que o galego non é digno para alguén que queira facer algo máis que criar vacas (a pesar de que ela coa súa amiga usa o galego), o velliño que fala galego pero considera que é inútil -pois seica só serve para estar en Galicia e non abre as portas a outros países-, etc. É tamén curioso o caso das dúas mozas da cidade (unha de Vigo e outra da Coruña) que aseguran que polas rúas das cidades ninguén fala galego; mais, elas introducen continuamente galeguismos no seu castelán, tales como: “Yo soy de la Coruña, neno” ou “No sé trebellar en esto”. Ou aínda, o caso do galán que coa súa muller (á que non mostra cariño) utiliza o galego e para a súa filla e a súa amante o castelán.
Finalmente, a pesar dos continuos intentos dos acusados e o arcanxo por demostrar a situación de bilingüismo de Galicia, o demo consegue convencer o xurado mostrando que o que se está dando é unha situación de diglosia: as linguas son utilizadas con valor social diferente.
Esta situación ten claras consecuencias para o galego: a restrición dos usos da nosa lingua, por presión do castelán; o aumento dos prexuízos lingüísticos que levan a identificar galego con atraso social e o castelán con avance; a influencia negativa do castelán no código lingüístico galego (interferencias), o que contamina todos os niveis da lingua.
Ao final da obra, a pesar de que o público xa está morto (como todos os alí presentes), aparece entre todos eles un vivo: a última esperanza para salvar o galego.
ISABEL GARCÍA ALFONSO (2º BAC B)

Máis fragmentos na rede:

Guión: ENDL
Locución: Sara García (2º ESO) e José Manuel (3º ESO)
Música: Djad (dous temas con Licenza CC tomados de Jamendo)
Arquivo completo